وميادة اتكسفت تدخل ووقفت قدام باب الغرفة من برا. رحيم أتكلم مع أنس: حمدلله على السلامة يا أنس. اتكلم أنس وهو بيبص لـ رحيم بامتنان: شكرا يابن عمي.. انت اللي أنقذت حياتي. رباب كانت بتبص لـ رحيم بحب وماسكه في رجل أنس وبتضغط على رجله ومش حاسه.. قالت برقه ودلع: رحيم طول عمره راجل وسيد الرجاله. رحيم كتم ضحكته على طريقة كلام رباب.. وحبيبة رفعت حاجبها بغيظ وهي بتبص لـ رباب. أنس زعق لها بضيق: اللي انتي مسكاها دي رجلي انا يا غبيه.
اتكلم الجد مرسي وهو بيقوم يقف: قومي يلا رباب روحي مع امك متضايقيش اخوكي. ردت امال ام أنس بعياط وهي قاعده على الأرض: انا مش هسيب ابني هنا وامشي. اتكلم الجد بصرامة: إحنا معندناش حريم يباتوا برا.. هاتي بنتك وتعالي ورايا وابوه هيقعد معاه.. وانت يا رحيم خد مراتك وارجع القصر. اتكلم رحيم وهو بيبص لـ حبيبة: يلا يا حبيبة عشان نوصل ميادة في طريقنا. أنس اول لما سمع اسم ميادة انتفض من مكانه وسألهم بلهفة: هي زفته هنا؟
كلهم بصو له بدهشة وميادة ضغطت على شفايفها بغيظ وهي واقفه برا. عبد الرازق بص لـ رحيم وقاله: تعالى معايا يا رحيم برا عايز اتكلم معاك. رحيم خرج معاه.. ووقفوا بعيد يتكلموا. حبيبة خرجت ووقفت برا قدام باب الغرفة وهي بتفكر تقول لـ رحيم ولا لأ. ميادة لقت كلهم طلعوا من الغرفة وأنس بقى لوحده جوه.. دخلت وكأنها هتطمن عليه.. أنس اول لما شافها ابتسم وقال: جايه بنفسك تطمني عليا؟ دا انا طلعت جامد واتحب ؟
بصت له بغيظ وقالتله: دا شكل واحد كان بيمــ,,ـــــوت!! دا حتى السم مأثرش على لسانك!.. ورفعت صابعها في وشه بتحذير وقالتله: كلمة زفتة دي لو قولتهالي تاني عارف هعمل فيك ايه؟ غمز لها وقال: هتعملي ايه؟؟ بصت له بغيظ وقالت: انت بارد اوي على فكرة.. وانا غلطانه اني جيت اطمن عليك. اتحركت عشان تمشي لكن صوت أنس وقفها وهو بيقول بنبرة جادة لأول مرة: ميادة… وقفت مكانها بدهشة وبصت له.. ابتسم وقال بلطف: شكرا انك جيتي تطمني عليا.
ابتسمت وهزت راسها بخجل وخرجت بسرعه من الغرفة ووقفت جنب حبيبة برا. رحيم خلص كلام مع عمه وقرب منهم واخدهم ومشيو. وصلوا ميادة على بيتها.. ورجعوا القصر. دخلوا غرفتهم ورحيم كان ملاحظ شرود حبيبة طول الطريق وفيها حاجة متغيره.. فكر انها زعلانه عشان الفرح مكملش. حبيبة خلعت الحجاب بتاعها اول لما دخلوا الغرفة.. وكانت لسه هتدخل الحمام تغير ملابسها. رحيم مسك ايديها ووقفها وهو بيبص لها بحب وقالها: عارف ان انتي زعلانه عشان الفرح مكملش؟
حبيبة رفعت وشها ببطء وبصت له.. عينيها فيها خوف مكتوم وكلام متلخبط على طرف لسانها.. لكن قبل ما تنطق بأي حرف.. عيون رحيم سبقتها. اتجمد مكانه وهو بيلاحظ العلامات الواضحة على رقبتها.. آثار صوابع متغرسة بعنــ,,ـــــف.. ملامحه اتغيرت في لحظة.. عينيه اسودت.. وفكه اتشد.. وصوته خرج منخفض لكنه مليان غضب: مين اللي عمل فيكي كده؟…. بقلمي ملك إبراهيم. … يتبع استر يارب😱🏃🏃😂 تفتكروا حبيبة هتحكيله ولا هتخاف؟🤔 منتظرة رأيكم في التعليقات ♥️ حبايبي متنسوش التفااااااعل😍💪 عايزين البارت دا يوصل لتفاعل اكتر ونوصله ل 5000 لايك 😍💪